Et as planetes est poesté ou cercle. Il i a poesté de meson, et si i a poesté d’eneur, et si i a poesté de triplicité, et poesté de termine, et poesté de faces, mes la poesté de la meson est .5. forces, et la poesté de l’oneur .4., et la poesté de la triplicité .3., et la poesté du termine .2., et la poesté de faces .1.
Hagin le Juif [Abraham even Azre], Commencement de sapience, 1273, p. 35-36.
Et trois des signes sont, pour quoy ils sont només triplicité de nature de feu : Aries, Leo, Sagictaire orienteles, et sont de une triplicité appelees. La seconde triplicité est de nature de terre meridionele : Taurus, Virgo et Capricorne. Et la tierce triplicité fait Gemini, Libra et Aquaire, de nature de l’air occidenteles. Mais la quarte triplicité est de nature de yaue septentrioneles : Cancer, Scorpio, Pisces.
Pèlerin de Prusse, Elections universelles des douze maisons, 1361, fol. 36v.
Quelque signe monte en orient, quar se li Toreaus est ascendenz qui est de nature de terre, li Lions sera en l’angle de la terre qui est de nature de feu, li Escorpions en occident qui est de nature de aive, li Aquaires en mi le ciel qui est de nature de air, et autresi de touz les .xii., quar chascuns est de la nature de i. des .iiij. elemenz, et por ce dist Zael que li .xii. signe sunt devisé en .iiij. triplicitez, c’est a dire que chascun .iij. des .xii. sunt d’une nature et d’un acort.
Anon., Introductoire d’astronomie, ca 1260, p. 61.
Et covient bien savoir les tables / Por savoir les leus covenables, / La ou il voient arriver / Les planetes a le aiver, / Quar a ce doit metre grant peine / Li bons mestres qui bien se peine, / Que primes son tacuin face, / Par quoi set le terme, la face, / L’exaucement et la meison, / La triplicité par reison / Des planetes ou il demorent, / Et par lesquels degrez i corent, / Par quoi il sevent dont ce avient /Que a chascun planete apartient.
Anon., "Poème introductif à l'horoscope de Baudoin de Courtenay et à l'Introductoire d’astronomie", ca 1260, ms. fr. 1353, fol. 3vb.
El commencement, ce que devoit estre de la triplicité de nostre empereor est trové que il li fu contraire. Quar li Toreaus, la Virge, li Capricornes sunt de sa triplicité, qui sunt signe feminin et nocturne, froit et sec, de nature de terre, melancolike et aigre savor, et sunt meridian. De laquele triplicité sunt segnor Venus de jorz et la Lune de nuiz.
Anon., Jugement astrologique sur la naissance de Baudoin de Courtenay, ca 1260, ms. fr. 1353, fol. 102vb.
