Et pource devons nous oultre savoir que Ypocras dit absolutement que li Eunuche ne podagrisent point, et per consequens n’il n’encourent point les autres manieres de goute. Selonc ce que Galiens le expose, pource que au tans de Ypocras on n’avoit encore onques veü les eunuches podagrisier pour lor sobre et raisonnable vie, mais au jour de huy, dit Galiens, les gens vivent en luxure et en delices et en gloutonnie, comme il font encore maintenant, et pource dit il que, dés son tans, il podagrisoient bien pour le vin, par aventure, qu’il bevoient, et pour les grans excés. Et pource dit meismes Aristotes que aucunes fois il sont gouteus, combien que ce ne soit mie souvent, pource que a son tans, qui fu environ .500. ans aprés le tans de Ypocras, li homme commenchoient ja a delicieusement vivre et a faire grans excés de vins et d’autres choses.
Evrart de Conty [Aristote], Problemes, ca 1380, X, 37, fol. 184r-v.